چەند پاییزە

بوومەتە هەوری پەلكەی خەزان‌و

باوەش بەخشپەی وەرینی

گەڵا دەكەم

چەند زستانە

لاوك بۆ بەستەڵەكی چڕی بەفری

سرۆشت دەڵێم!

چەند بەهارە، ئاونگی گوڵ، خوناوەی بەرگەردنی شۆخێكی مەست،

شنەی كانی‌ و ڕەهێڵەی ئەستێرە و

سروەی بەیان‌ و

ڕۆحی داری سروشت

بوونەتە هاودەمی یاد ‌و

شادەماری،

چاوە زیتەكانی

ئەم شێعرە یاخییە.

تاڤگەی شێعری ئەم ژینە نغرۆیە،

بزە‌و خەندەی تاسەرباری كەرنەڤاڵی نیشتمانێكی بێ مرۆڤە.

حەزی نیگای ئەم باخچەیە، خشپەی پێی بارانێكی بێ ئۆقرەیە.

كاتێ مەستی باوەشی

گوڵێكی تامەزرۆ دەبێ،

كەس لە بوغزی تەلیسماوی نیگای ناگا.

عاشقترین زەمەنی كەسكی بەهار،

لەنجەولاری شەونمە لە باوەشی

گەڵای مەستا.

شوخێك دەیگوت:

بێنازترین گوڵی سروشت،

گوڵە عەزرەتیی دەم پاییزە،

لە هەرچی گوڵ ‌و كانی ‌و كچ ‌و مانگەشەو و

جوانییە عاجز‌ و زیزە.

عاشقێك دەیگوت:

پەنجەرەی بەختەوەرەترین ئامێری ناو سروشتە،

كاتێ گوێی لە چپە و سرتەی پڕ لە خۆزگەی كچ‌و كوڕ

و حەسرتی بزە‌ و نیگای

چاوەڕوانیی دوو دڵدارە،

هەر چەركەیەكی لا خۆشترین زەمەن ‌و

هوگرترین بەهارە.

سەمای

پەنجەی باران

نمەنمە

دەفی لێ ئەدا،!

چەپڵەی

بریسكە بریسكی ئاسمان،

هێدی، هێدی دەهۆڵی لێ ئەدا.

پۆل، پوڵ رووباری مەست،

گۆرانیان بە لەنجە‌و لار

بۆ زەریای باوك ئەخوێند.

لە رەشبەڵەكی سووری سروشتا،

كانی ‌و تاڤگە ‌و كەزیەی خاو و

بەژنی شۆڕەبی، چناری لاولاو پێچراو،

بزەی سوێسنی گراوی مێلاقە و

ڕێحانەی تەڕپۆش، شەوبۆی بۆنخۆش،

شكۆفەی تەڕپۆش،

بە كڵاوی سوور بەڵەك و

چین چینی چاو بەڵەك،

وردیلە هەسارە لە ئامێزی "ئاوی"ی ئاسمان خەریكی

چاوبڕكێن.

ئەسر تۆراوە لەم زەمەنە پێكەنینە،

چ خۆشە چ قاقایەكە؟

چ ڕسكانێكی ئەوینە!

سیروان بە لەنجە بۆ باوەشی زەڵم دەئاژوێ‌،

زرێبار شەپۆلی بزەی دەداتە "نێ‌"و "دۆڵاشان"

رەتانی گریانە لێرە،

هەڵپەڕكێی پێكەنینە،

وەرە ئەی عاشق،

خۆت بەم شەپۆلە شادییە بسپێرە،

لە پەڕپەڕۆچكەی ئاسمان،

بزە زاوەتە نیگای پڕ حەژمەتی مانگ،

گێژی ئەوینم،

غەرقم لە نێو پەلوپۆی

نیگای پڕ حەسرەتی "مانگ"دا.

لەو لاشەوە كوڕە گەنجێك

سێوی سووری وەفای دڵداری،

دەگرێتە باخەڵی پڕمێخەكی یاری.

گڤەی "با"و جریوەی مەلی تاساوی

بەهار، ئاهەنگی

گۆڤەندی ژیان لێ‌ ئەدەن.

لە هەناوی پیرەی بن دیوارا،

خۆزگەی كوڕە گەنجە و

قیژەی ئاسكەكچی سەر كانییە

خستوویەتە كوڵی گریانێكی خەست،

لێرە زەمەن پاڵ بە مرۆڤەوە دەنێ‌،

بۆ بووژانەوە،

لێرە هەتاو زەردەخەنە دەبەخشێ‌،

بە خشپە و شنەی ڕۆحی كەسكی كانی،

لێرە ژیان پێدەكەنێ‌ بەڕووتا،

لێرە خۆزگە بانگت دەكا بۆ ئەوینێكی ئاسمانی،

لێرە مرۆڤ سروشتە و سروشتیش مرۆڤ،

لێرە هەناسەی گوڵ

باوەشێنی كەزیەی خاوی پەپوولەیە،

دیلانی پێكەنینی گوڵ،

ڕازیاگ بە خشڵی سوور ئەرخەوانی،

گیانڕێژی ئەوینە لە ژێر سەمای

پەمەیی هەوری بەژنتا.

بەهارێكە و گەڵا، گەڵا

دێمە ژوانی چاوەكانی بێ‌ نازی تۆ.

زەمەنێكە و شنە، شنە

ڕۆحی كەسكی ئێواران

بە ماچی سووری ئەوین

دەڕازینمەوە،

كازیوەیە و تنۆك، تنۆك

ڕووناكایی،

چەپك، چەپك

خۆری زێڕین

لەنجە، لەنجە

نازی ژوان،  

هێور، هێور

شەپۆلی شادی

باخچە، باخچە

تاڤگە، تاڤگە

قژی خاو،

رەهێڵ، رەهێل

  بارانی خوڕ،                                             

نیگا، نیگا

چاوی خومار،

نمە، نمە

شنەی عەشقی

بەهاری یادی تو پرچی پەرێشانی سروشت و

هەنسکی بێ بڕاوەنەوەی سەفەرە و سەفەر.

بەهاری ٨٧ - کۆیە