(1)

 لێم بڕوانە چاو هەڵبڕە

بزانە ژیان چەند شیرینە

تۆ گوێڕایەڵی شێعرەكانمی و

منیش دەبمە دزی وشەیەك لە چاوەكانت.

(2)

دونیا فرە بچووك بۆتەوە،

تا دێم  ماچت بكەم

لێم زیز دەبی و دیسان سەفەر و

درێژیی پرچی پەرێشانت ئەو جادانەن

كە بە خەونی قاڵاوەكان كۆتاییان دێت.

(3)

بمكە بە شاعیر!

پێبكەنە و لێمگەڕی

هەتا لە هەرێمی نیگاكانەوە بێمە خوار و

دیوانێك لە ماچت بۆ بنووسمەوە.

(4)

چۆن چۆنی لە جەستەت بگەم

ماچەكانم سەهۆڵاوین

ئەرێ‌  لەگەڵ "ئێوێرێست" خزمایەتیت نیە  كناچێ‌؟

(5)

دەستەكانم بۆنی تۆیان لێوە دێ‌،

بۆنی تۆ...

لێوەكانت

چاوەكانت

كەزیەی خاوت

من جینایەتكارترین عاشقی سەر گۆی زەویم.

(6)

تام و چێژی ماچەكانی تۆ دەدەن.

كاتێك باران دادەكات و من 

بێ‌ چەتر

چەند گوناحە ماچ لە لێوەكانت دەدزم.

(7)

درەنگە  كەنیشكەكەی بەر باران،

وەرە لەباتی شێعر وتن

لێوەكانت هەڵمژم،

وشەكان دەیانەوێ‌ بنوون،

درەنگە كناچێ.

 

11/4/1391