ئێمە هەموو خەونی دۆڕاوی زەمەنێكین
كە پێی دەڵێن زیندگی،
ئێمە هەموو خرمەی شەستە رەهێڵەی ئاسمانێكی میچ قوڕماوین،
نە ئاسمان تاقەتی هەیە رامانگرێ‌ و نە زەویش لە دەروازەی تینوێتیدا پێشوازیمان لێدەكا
بە نێو بازاڕی رەنگ فرۆشەكاندا چاو دەگێڕین، لە هیچ رەنگێ‌ ناچین.
كەچی پێمان دەڵێن ئێوە هەموو دو رەنگن،
نازانم بۆچی بۆمان نیە لە هیچ ئاویەر و ئارێز و كەلیخانێكدا دەواری عەشق هەڵدەین؟ نازانم بۆ؟
دەڵێن ئێوە: هەنووكەتان فرۆشت بۆ داهاتوو.
دەڵێن ئێوە: گوناهیترین عاشقی پێتەختی خۆشەویستین.
چاو هەڵبڕن، بڕوانن، چۆن چۆنی 
رووبارتان كردۆتە جۆلانەی دڵ، خەونتان كردۆتە رووگەی ژیان، 
سەرینتان بەردە و پێخەفتان هەور و خاك، 
ئێمە هەموو لەوێوە دێین، 
لە كۆڵانە خۆشبەختەكانی مناڵی و لەناو خەونی زەریای پاییزی رۆژهەڵات،
لەوێوە دێین، لە كۆڵانە شەكەتەكانی "قەتارچیان" و لە بناری سەوزی ئاویەر و ئەردەڵان و
لەناو سەمفونیا و نوتەی "هۆهۆ كاڵە بەی پێم ئەڵێی فەرمووتە شێتم هەی بە قوربانی ئەودەمە"وە هاتووین.
هاتووین و گۆیژەی شاری بابان، هەولێری هۆلاكۆبەزین، بۆتە  باوەشی حەشارگەمان
ئێمە هاتووین پێكی لە شەڕابی جوانی و دەستەچینەیەك لە گوڵی یەك دڵی و 
جانتایەك پڕ لە بۆنی عەتری گوڵە هێرۆەكانی هەورامان و 
سەرێك تژی لە لە ئاواتەكانی "كۆمار" و
دڵێك پڕ لە ئومێد و هەورێكی پڕ لە بارانمان بۆ هێناون،
ئەی ئاشنا بە زامی من، ئەی نزیكتر لە خۆزگەی دڵە زامارەكان
پێمان بڵێن ئێمە كێین؟
ئێمە هەموو هەر دێین و دەچین،
بەڵام ئێستاش نازانین بۆ هاتووین و بۆ كوێ‌ دەچین؟
لەسەر سنوور هێڵێكی رەش بۆتە پەرژین لە نێوانمان،
بێباكانە پێمان دەڵێن، ئێوە كێن؟
ناتاناسین؟ بۆ كوێ‌ دەچن؟ 
ئێمەش بە ترسەوە، بە سرتەوە، بە چرچەوە،
دەڵێین: كۆتــرین، خەڵكی هەرێمی باڵندەین،
بۆ هەڵفڕین چیامان ئەوێ‌، بۆ نیشتنەوە هاوپشتیی برامان ئەوێ‌.
لێمان گەڕێن با لەگەڵ گمەی كۆترە شینكەكانی باباگوڕ و
 هەیبەت سوڵتان لە رەشبەڵەكی شاری هەڵمەت و قوربانیدا بەشدار بین.
ئاخر دایكم زۆر لەمێژە دەسرەی سەرچۆپیی ئەم گۆڤەندی بۆ كڕیوم.
من تەتەرم، نامەی "مەستوورە"م پێیە بۆ "عادیلەخان".
پەیامی "هێمن"م پێیە بۆ "نالی"،
دیاریی "قازی"م پێیە بۆ "شێخ"، 
گوڵی "ساراڵ"م پێیە بۆ "سەفین"، هەیبەتی "شاهۆ"م پێیە بۆ "پیرەمەگرۆن".
هەگبەی "لەیلاخ"م پێیە بۆ "گەرمیان"، سڵاوی گەرمی "كرماشان"م پێیە بۆ كەركووك.
سوخمەی حەریری "سەردەشت"م پێیە بۆ دەستە خوشكی هەڵەبجەی زامار.
دە لێم گەڕێن با لە خەڵوەتی ئەم شەوەدا
دەوارێك هەڵدەم دوا هەنسكی گریانی پڕ لە كوڵم
بڕژێنمە سەر دەفتەری تامەزرۆم.
هێندە بە ژان و برینم كە گەرەكمە
 پڕ بە گەرووی شێعری یاخیم هاوار بكەم، 
كە هەموو سەوداسەرانی شار بێنە سەرینم،
هێندە دڵپڕم كە هێشتا باران قژم بۆ دادەێنێ‌.
لە  كەناری یادێكدا پیاسە لەگەڵ 
حەسرەتەكانی خولیا دەكەم،
لە زەردەپەڕی ئێوارەدا چاو لە ئاسۆ دەنووقێنم و
لاپەڕەیەكی دیكەی ژیان رەشنووس دەكەم،
شەو لە خەما نیشتمان دێتە باڵینم و
 دەستێ‌ بە قژ و كاكۆڵمدا دێنێ‌ و 
بە دزییەوە چەپكێ‌ گوڵی سەوز دەخاتە جانتاكەمەوە
بە چرپەوە پێم دەڵیت: خەم مەخۆ گیانە، 
ئێمە هەموو گوڵی گوڵزارێكین،
لەگەڵ ئێوەدا دێین، لە هەناوتانا دەبارین،
بە قەڵس بوونتان تووڕە دەبین،
لە دەفتەرتانا دەنووسین، دێینەوە خەونی سەوزی تاراوگەتان.
لەگەڵ ئێوەدا دەگەڕێینەوە، لەگەڵ ئێوە ون دەبین.
دواییش نووسی و لە قەوارەی شێعرێك و لە ژوانی وشەكاندا
هاتەوە بیرم، نووسیبووی: ناوی ئێوە پێم دەڵێ‌ چۆن بنووسم گوڵ
خولیای ئێوە پێم دەڵێ‌:
چۆن بڵێم ژیان، دەتانخەمە شێعرێكەوە كە فڕین لە پەپۆوولەوە فێر بووە،
لە دڵێكدا جێتان دەكەم كە سەرەتای ئەوین و كۆتاییشی هەر ئەوین بێ‌.
ئێوارەیەك بە سیروانتان دەسپێرم كە لرفە لە شاخ فێر بووە.
نیشتمان نووسیبووی ئێمە هەموومان لە یەك دەچین، 
قسەمان یەك قسە و ئەوینمان هەمان ئەوین و
سەفەرمان هەمان سەفەر و هاتنمان هەمان هاتن و
چوونیشمان هەمان چوونە، شێعرمان هەمان شێعر و 
نیشتمانمان هەر ئێرەیە.
25ی رێبەندانی 1390